Santiago acolleu un novo Encontro do CCG
Onte, martes 21 de maio, despraceime ata a capital de Galicia para asistir, no Pazo de Raxoi, ao interesante encontro “Abrindo vitrinas: a metalurxia do Bronce Final na colección arqueolóxica da Universidade de Santiago de Compostela“.
O evento, ao igual que o de A Guarda, estivo organizado polo Consello da Cultura Galega, versou sobre o traballo desenvolvido polo Incipit-CSIC, que se resume nestes eixes centrais: “1) o estudo da historia e vicisitudes das pezas que compoñen a colección –procedentes na súa maioría das antigas coleccións de Santiago de la Iglesia, Federico Maciñeira e José Viqueira Barrio–, que permitiu recuperar interesante documentación inédita; 2) a súa caracterización arqueométrica mediante técnicas diversas; 3) a restauración das pezas, e 4) a montaxe dunha exposición que abrirá as súas portas este verán”.
O obxectivo deste encontro tal e como puiden comprobar, foi presentar “unha síntese destes traballos, que achegan información de grande interese e contribúen notablemente á revitalización desta colección, conformando un modelo de investigación-conservación-revalorización que se poderá aplicar no futuro a conxuntos semellantes doutros museos e coleccións visitables”.
Deron a benvida aos asistentes, abrindo o acto, a presidenta do CCG, Rosario Álvarez Blanco, xunto con Rebeca Blanco Rotea, coordinadora da Sección de Patrimonio e Bens Culturais da institución.
Pola súa banda, Xosé Lois Armada, investigador do Incipit-CSIC, interviu coa ponencia “Investigando a metalurxia do Bronce Final na colección arqueolóxica da USC: unha síntese dos resultados”.
Yolanda Porto Tenreiro, arqueóloga-restauradora e xerente de Fráxil, versou sobre “Tratamento de conservación dos artefactos do Bronce Final da colección arqueolóxica da USC”.
Antoni Nicolau, director de proxectos de Kultura S.L., titulou a súa disertación “Cinco vidas, unha historia. Formulacións e deseño dunha exposición temporal”.
Xa para rematar, realizouse un debate co público asistente, que estivo dirixido por Beatriz Comendador, arqueóloga e profesora da Universidade de Vigo.
