Fotos noticia: J.R. // Foto portada: “A Guarda, Mar de Sal”

O pasado luns 17 de setembro tivo lugar na Casa dos Alonso (A Guarda-Pontevedra) a presentación do máis que interesante proxecto “A Guarda, Mar de Sal“.

Na compaña do historiador Xoán Martínez Tamuxe achegámonos ata a vila do Trega para coñecer de primeira man o plan de recuperación e posta en valor das salinas da zona do Seixal e Camposancos.

O acto abriu coa intervención de Xavier Crespo, concelleiro de Patrimonio, quen deu a benvida aos asistentes, presentando así mesmo a Montserrat Magallanes, concelleira de Turismo, a Elena Herbello, xerente do GALP Ría de Vigo-A Guarda, a Mar Cortegoso, directora das escavacións e, como non, ao amigo Brais Currás, coordinador e investigador do proxecto (investigador do CEAACP da Universidade de Coimbra e membro do grupo de investigación EST-AP do CSIC).

Intervención de Brais Currás, na compaña de Xavier Crespo

Todos os intervintes destacaron a envergadura deste proxecto para A Guarda, salientando que “permitirá potenciar este ben patrimonial a nivel económico, turístico e cultural, cun valor arqueolóxico de importante relevancia e cun proxecto de ciencia cidadá pioneiro en Galicia e España», sinalou Brais Currás.

“O plan contempla a escavación arqueolóxica, traballos de topografía e prospección, documentación fotogramétrica, rutas guiadas, restauración e consolidación, instalación de paneis informativos, análise edafolóxica, datación por OSL, un proxecto de ciencia cidadá que botará a andar o próximo ano, deseño dunha páxina web, e a edición dunha guía arqueolóxica cos resultados dos traballos”.

Temos claro despois da presentación de “A Guarda, Mar de Sal” que a implicación dos veciños, xunto co apoio de institucións públicas e privadas unido á recoñecida valía e prestixio do seu coordinador Brais Currás, serán garantía de éxito para este ambicioso proxecto. Máis info, aquí.