Gondomar e o IEM honran a Victoriano Taibo

Segundo me comunican dende o IEM (Instituto de Estudos Miñoráns) a través de Miguel Anxo Mouriño -do departamento de Lingua e Literatura- por décimo ano consecutivo, “o Concello de Gondomar, en colaboración co Instituto de Estudos Miñoráns, comprácese en convocar unha nova edición do premio de poesía que pretende honrar a figura de Victoriano Taibo, poeta das Irmandades da Fala, mestre galeguista, creador de ducias de artigos sobre a lingua e sobre feitos e personaxes galegos, narrador, membro da Real Academia Galega e do Instituto Histórico do Minho, persoeiro, en fin, de méritos acreditados e fondamente comprometido coa lingua e a cultura galegas”.

Dende o IEM lembran que “o premio instituíuse no ano 2008 co mecenado inicial da Entidade Local Menor de Morgadáns que, en 20015, a través do novo equipo de goberno resultante das últimas eleccións, eliminou unilateralmente o compromiso adquirido, e a continuidade do premio quedou garantida polo concello de Gondomar, que asumiu o mecenado a partir dese momento. Dende aquela data inicial o acervo literario galego incrementouse con 10 novos poemarios de 11 autores diversos que acadaron sempre críticas favorables”.

Segundo recalca M.A. Mouriño “esta aparente incoherencia entre 9 certames, 10 libros e 11 autores ten doada explicación. En 2009 o premio foi repartido ex aequo entre dous poemarios; un deles, ademais, era de dobre autoría”. Esta é a relación dos galardóns concedidos ata o de agora:

2008 Carlos negro Cultivos transxénicos
2009 Elvira Tobío e Silvia Penas Biografía da multitude // MªCarmen Caramés Cuarto minguante
2010 Mª Goretti Fariña Devastacións dispoñibles
2011 Carlos Solla Holocausto Zacoe
2012 Conchita Álvares Lebredo Distancias e simetrías
2013 Ramón Sandoval Territorios estraños
2014 Lara Rozados O caderno amarelo
2015 Iñaki Varela Do outro lado das portas
2016 Xosé Iglesias Lamela A relixión do mar

“O último poemario citado está aínda de plena actualidade, acadando críticas moi favorables e colleitando éxitos nas diferentes presentacións (incluída a realizada, suxestivamente, por el dende o seu barco) que están tendo lugar en moitos e diversos lugares de Galicia, como antes fixeron outros”.

Queda, pois, convocado, no centenario da fundación da Irmandade da Fala de Santiago, o X Premio de Poesía Victoriano Taibo dirixidos a poetas en lingua galega que queiran achegar as súas obras antes do 31 de xullo de 2017, como se recolle nas bases. O premio está dotado con 3000 euros e unha escultura conmemorativa de Fino Lorenzo.

Deja un comentario

Tu dirección de correo electrónico no será publicada. Los campos obligatorios están marcados con *

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies