Galicia: os seus Itinerarios Culturais Europeos

Organizadores, conferenciantes e participantes do I Encontro. (Foto: Xunta de Galicia)

Este luns 6 de novembro fun convidado á capital galega polo Plan Xacobeo, con motivo da conmemoración do 30 aniversario da declaración do Camiño de Santiago como Primeiro Itinerario Cultural Europeo.

Organizado por Turismo de Galicia, participei pois, no I Encontro dos Itinerarios Culturais Europeos en Galicia, no Centro Superior de Hostalería de Galicia, en Santiago de Compostela.

En verdade, foron máis que interesantes as conferencias e propostas realizadas para intercambiar estratexias e avanzar en futuras colaboracións para a promoción turística da nosa Comunidade.

Inaugurou esta xornada Rafael Sánchez Bargiela, director-xerente da S.A. de Xestión do Plan Xacobeo, quen falou dos “Camiños de Santiago de Compostela” e do “Itinerario Europeo do Patrimonio Xudeu”.

De seguido, interviu Mónica Vilas Cerneira, técnica de Cultura e Turismo do Concello de Catoira, cuxa conferencia tratou sobre “As Rutas dos Vikingos“.

Pola súa banda, Joani Jartin Salgado, técnica de Turismo do Concello de Meira abordou o itinerario “Ruta Europea das Abadías Cistercienses“, con protagonismo especial para o noso veciño Mosteiro de Oia.

A “Ruta Europea dos Cemiterios” contou -aínda que a simple vista resulte raro- coa animada conferencia de Xesús Martínez López, historiador e guía do Consorcio de Turismo da Coruña.

José Manuel Rey García, director do Parque Arqueolóxico da Arte Rupestre de Campolameiro falounos de “Os Camiños da Arte Rupestre Prehistórica“.

Así mesmo, a conferencia sobre o “Itinerario Europeo das Vilas Termais Históricas” correu a cargo de Nita Torres Reboiras, xefa do Servizo de Termalismo e Turismo do Concello de Ourense.

O arqueólogo da Deputación de Pontevedra, Rafael Rodríguez Martínez, quen entre outros traballos realizados na nosa zona, foi dos primeiros en inspeccionar o Petróglifo de Ghorghalado (As Eiras), disertou sobre a “Ruta dos Fenicios”.

Moderou este I Encontro de Itinerarios Culturais Europeos en Galicia, José Luis Maestro Castiñeiras, director de Dirección de Competitividade de Turismo de Galicia.

Precisamente foi Nava Castro, directora de Turismo de Galicia, a encargada de clausurar esta xornada, resaltando que “estes itinerarios estanse a consolidar como unha das mellores maneiras de descubrir Galicia a través da nosa cultura e o noso patrimonio”.

Segundo se pode ler na web da Xunta de Galicia “todos eles intercambiaron as súas experiencias e analizaron algúns dos retos aos que se enfrontan no eido da xestión e financiamento. Do mesmo xeito, incidiron na necesidade de promover o coñecemento destes itinerarios como rutas culturais de enorme potencial turístico e patrimonial, con actividades conxuntas. Coincidiron, ademais, na importancia de realizar futuros encontros para avanzar en posibles colaboracións, así como para avanzar en aspectos relacionados coa sinalización destes itinerarios ou na formación neste eido”.

A Catedral de Santiago, meses antes das obras na fachada (2013). (Fotos: J.R.)

O programa conmemorativo polo 30 aniversario completarase con actividades como o X Congreso Internacional de Estudos Xacobeos Iacobus Patronus, con especialistas de varios países coordinados polo Comité Internacional de Expertos do Camiño de Santiago; e co seminario Transnational Tourism Themes and Routes, promovido por Turismo de Galicia, xunto á Organización Mundial do Turismo (OMT) e á European Travel Comission (ETC).

Deja una respuesta

Tu dirección de correo electrónico no será publicada.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies